Comparando imposiciones

Tan llocos, estos conservadores.

Agora los del PP dicen que hai que pone-yos a los neños una asignatura obligatoria d’asturiano. Que ye parte de la nuestra cultura, de la de toos los asturianos (anque nun seyan falantes). Que nun se pue pescanciar lo que semos ensin conocer l’asturiano, que ta presente nel pensamientu de tanta xente y lu configura. Y que anque ún nun seya falante d’asturiano, o nun lo quiera ser, que d’alcuerdu, pero que tol mundu tien que conocer siquiera un pocoñín los fundamentos. Sí o sí.

Pal que-y abulte que falar n’asturiano diba ser ofensivo, y tien reparos morales en facelo, dicen que d’alcuerdu, que pue facese oxeción de concencia, pero que entós, polo que punxe enantes, va haber qu’estudiar una asignatura alternativa sobre les cultures tradicionales perifériques d’España (con especial mención, claro tá, a la asturiana y a la llingua). Que eso nun obliga a nadie a implicase ideolóxicamente, que son conocimientos humanistas imprescindibles.

Tovía más: estos partíos conservadores tan faciendo intentos pa que se reconoza tó esto, non ya nel estatutu d’Autonomía, sinon ¡n’Europa! Quieren que na Constitución Europea (sí, esa del cuentu de la buena pipa) se fale con lletres mui grandes d’estes tradiciones culturales qu’hai que conservar, y que se declare Asturies como una rexón enguedeyá inevitablemente cola llingua asturiana.

Muncha xente diz-yos que nun ta d’alcuerdu. Que eso que disfracen d’identidá cultural ye namás que’l primer pasu pa otres reivindicaciones de los nacionalistas (que hestóricamente sabemos que enxamás tan contentos, creen que el mundu ye comu ellos lu ven, y nun van parar hasta que temos toos como notres dómines, guerreando unos contra otros).

Que nun hai nada de malo’n estudiar asturiano, pero caún na so casa si quier. Incluso nes escueles, si fai falta, pero siempres como daqué optativo.

Eso dícenlo los más suaves. Los que más se enfurruñen dicen que estudiar asturianu ye una perda de tiempu, y que si nun taríen meyor los neños deprendiendo daqué útil, y echando’l tiempu’n deprender inglés, o informática, que va face-yos falta pa ganase la vida. Y que les clases d’asturianu nun sedríen más que un inventu pa que chuparen del bote los cuatro llistos de siempre, los profesores d’asturianu, eses rémores que nun faen ná de provechu pa la sociedá y tan ehí enseñando les sos enseñances inútiles.

Pero nun hai manera. Los conservadores d’esti país siguen emperraos en que toos estudiemos asturiano, y que la nota cuente, y el que nun quiera estudiar asturiano tenga que estudiar otra cosa pa nun salir ilesu.

Agora que lo pienso, toi dándome cuenta… Confundíme en dellos sitios al escribir esto. Hai coses que tan mal puestes. ¿Nun se nota?

Nun diba falar del asturiano y el nacionalismu, sinon de la relixón. Camudando una cosa pola otra, el testu ya se pue lleer bien.

Pero agora que lo pienso… nun pescancio por qué los partidos conservadores tienen, polo xeneral, un puntu de vista tan pragmáticu pa liquidar el asturiano y tan espiritual pa cola relixón.

Anuncios

Una respuesta to “Comparando imposiciones”

  1. Anonymous Says:

    ia fácil abondo. No hay un politico bono. Tos al.louriaos. Tos.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s


A %d blogueros les gusta esto: