Conciertu de Chuck Loeb

Dempués de tantes pelleyáes de los políticos, tenía’l rixu de escribir sobre coses guapes. Tengo pendiente cuntar daqué sobre’l fin de selmana que pasé’l otru día’n Pesoz. Pero ayeri tuve una esperiencia d’eses que se remembren. A última hora, diome por dir a ver el conciertu de Chuck Loeb nel centru cultural de CajAstur (hai que dir ceo, porque llénase; menuda cola hebía al minutu de aportar yo, que ya quedé faciendo cola fuera).

Cuandu a los dos minutos de conciertu ya nun tienes axetivos, ún piensa qué coime va escribir mañana nel blog.

Resulta que salen los músicos al escenariu, y lo que veo ye un paisanu -Loeb- con una camisuca clara, pantalones de loneta y playeros como del economatu, que paecía que venía de echar de comer a les pites. El baterista (Josh Dion) yera’l típicu gua.hacu de discoteca col pelu tiesu polos bordes de la cabeza y esa perilluca de diañu, que paecía que veníen de pañalu na cai Mon cuando diba de camín pa un chigre. El teclista (Matt King) diba semeyu a Loeb, pero yera calvu y con coletuca; poro, paecía un diseñaor gráficu. Y el baxista (Brian Killeen) paecía un prubín con una chaquetuca rescatá de debaxo’l colchón. Loeb garró una guitarra maciza (paecióme abondo raro; un músicu de jazz que tocó con Stan Getz creyí que diba usar guitarra de caxa). El gua.hacu sentóse a una batería bien simple, y el teclista tenía dos teclaúcos -que paecíen unu, ún enriba’l otru, nada que ver con Nacho Cano-.

Y entamaron a tocar.

Y a la primera ya mos pusieron a toos firmes. Vaya marcha. Vaya ritmu. Vaya nivel. Vaya mena de tocar. Tocaron Good to go, que ta nel discu caberu que grabaron, pero nun ye ni paecío a oyilos en directo. Camenté que eso yera romper el fuéu y lo demás cuentu. Pero ye que siguieron asina tol conciertu.

El baterista, Josh Dion, ye mui peculiar. Tien tol ratu una espresión totalmente tensa, cola boca abierta, faciendo unes mueques tremendes, y nótase que ta metíu al 100% no que toca, espresándose col cuerpu. Pero nun se dedica a tontáes; hai que ver cómo suena. Delles vegáes garraba una pandereta cola mano, pero… seguía tocando la batería, con un solu palu, y nun se veía que perdiera toque dalu na caxa. Sonaba meyor que muchos bateristas que usen entrambes manes. Y encima, el tío canta. Cantó un par de cancios (mentantu tocaba, claro). Menuda voz, menudu gustu.

Loeb toca muncho más elléctrico que lo que yo creyía, usa muncho pedales, soníos diferentes, ecos, efectos… Usó la mesma guitarra tol ratu, pero xuro que un solo que fizo sonaba esactamente igual que una guitarra española. De la técnica val más nun decir ná; ye xente que sóbren-yos deos, fálten-yos trastes. Podía tocar tres guitarres a la vez. (A veces sonaba como si lo ficiera).

El baxista y el teclista, pues nada, na misma llinia. Qué xente…

Chuck, amás de ser un músicu de quedar colos güeyos en blanco, paez buena xente. Como cuando contó la historia de la so muyer, y el so suegru, y dedicó-y un canciu.

De verdá que mui poques veces na vida me ablucó tanto un conciertu’n directo. Nunca nun oyí una música con fuerza tala, con tanta calidá, tantu sentimientu, con tal demostración de talentu y de poderíu. Tocaron cuasi dos hores, pero da la impresión de que podíen tocar tola nueche. Y eso que ye un estilu que en principiu nun ye, de cutio, el que más me presta. Pero la música bien fecha… puede con ún.

Y al final, salen al pasillu a vender cedés y firmar lo que la xente quixera, y facese fotos. Un fulano que estudió con Jim Hall, que tocó con Stan Getz a los 23 años… diz a la xente que por favor, se averen al final, a saludalos, a charrar. Yo diba con prisa y nun me quedé, pero merqué un discu de Loeb y otru del grupo de Josh.

Pues eso. El disco ta guapu, pero oyilos en directo ye pa caer sentáu. Toquen güey en Xixón. Si puedes, VETE. Ye pa no perdéselo.

Y llúeu hai perehí xente que se dicen músicos…

Y otros que dicen que nun pagar mata la música… Yo nun pagué pol conciertu. Y lluéu, diome la gana de mercar non un discu, sinon dos.

2 comentarios to “Conciertu de Chuck Loeb”

  1. Miguel Herrero Says:

    ¿Cuando tocan en Gijón?

  2. Guti Says:

    Hoy jueves 19, a las 20:00, en el Centro Cultural Cajastur.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google photo

Estás comentando usando tu cuenta de Google. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s


A %d blogueros les gusta esto: