Adiós, Facebook

Toi acabante de mandar que me borren la cuenta de Facebook, como diz equí. Ya me llegó un mensaxe diciendo que tan nello. A ver si ye verdá que dentro dos selmanes toi borráu.

Ye difícil decidise. Per un lláu, igual tenía que haber usáo más Facebook, y asina sabía ónde anden los mis conocíos y qué faen. Y pa enriba, güey paez que ye imposible vivir y rellacionase si nun uses Facebook. ¿Toi quedando fuera de la sociedá, toi faciéndome vieyu? ¿Toi echando el tiempu en coses peores que Facebook?

Por otru lláu, nun dexo Facebook porque nun entienda esti mundu, que ayudé y ayudo a crear. Toi agradecíu por vivir xusto una época na que nació Internet, que me paez que ye un fenómenu hestóricu; pémeque tuve, toi, esactamente na época más emocionante de too esto. Criéme y forméme y fíceme adultu (si lo soi) ensin Internet, ensin teléfonos móviles y ensin ordenaores, y lluéu vi cómo llegó too esto. Pueo comparar los dos mundos.

Si dexo Facebook ye por principios. Porque esti inventu maraviyosu que ye Internet quiero que seya, además d’un recursu técnicu, dalgo que ayude a cambiar les coses. Dalgo que lleve la cultura y el conocimientu a toes partes, que nos faiga meyores persones; les llavaores o les tostaores tuvieron el so impactu, pero esta ye una revolución d’otra naturaleza. Ye una oportunidá que nun podemos desaprovechar. Y nun pueo tar en Facebook por dos razones.

Una, porque dende el principiu Facebook ye una de les aplicaciones más cutres y mal feches que conozo, namás superáa por Myspace. Van arreglando coses, pero cualquier programa d’un aficionáu ta más cuidáu y meyor fechu. Nun quiero que esta xente tenga el premiu de regular la mio vida “virtual”, porque nun lo merez.

Dos, porque nun pué ser que un pasu tan importante como meter la nuesa vida nel espaciu virtual, en Matrix, lu demos con xente que ya demostró que nun pues fiate d’ellos. Son unos inconscientes, y nosotros más tovía.

Nun sé cuála ye la manera buena de vivir na rede, pero sé que nun ye Facebook.

Ya, soi uno solu; Facebook nun va dexar de esistir porque yo marche. Pero ye too lo que pueo facer. Ya dixe que yera cuestión de principios.

Anuncios

Una respuesta to “Adiós, Facebook”

  1. Mafias Says:

    Yo echaría-y un güeyu a Diáspora*. Igual te presta.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s


A %d blogueros les gusta esto: