Patrulla Dixie en Avilés

Ayeri tuve viendo a Patrulla Dixie na plaza’l Carbayéu, n’Avilés. Y hebo de too, bueno y malo.

Lo bueno ye que me presta muncho que daquién se dedique a esti xéneru, al jazz antiguu, que pémeque hai que seguir cultivando; dafechu, tocaron dalgún tema compuestu per ellos. Ye música vieya, pero más vieyu ye Bach, y nun dexa de ser xoven; y esta música, lo mesmo. Ayeri pudimos velo.

Otra cosa buena ye que sonaben perbién. Nun me paez un xéneru fácil, y cuandu tocaben toos xuntos, sonaba coordináo, perguapo. La verdá que me paeció una banda de lo más solvente.

Pero tengo que decir lo malo, que paez que siempre digo que los músicos locales lo faen too bien. Una cosa mala ye que, curiosamente, anque tocando xuntos, que me paez perdifícil, sonaben a gloria, dalgunos solos (nun voi decir cuáles) nun me paecieron nada acertáos.

Pero sobre todo, ye que nun acabo d’entender por qué un conciertu anunciáu pa les nueve y media la nueche entama a les once menos venti. A les nueve y media, los únicos que taben pol escenariu yeren los téunicos. A les nueve y media pregunté-y a ún y díxome dalgo asina como “No, tovía falta, toquen a les… bueno, nueve y media, tienen que tar al caer”. Ya vi el percal, marché a mercar un bocadillu, aporté a eso de les diez, y taben nel escenariu. Pensé que llegaba tarde, pero non; taben probando. Y dixeron pol micru al públicu presente: “Bueno, pues ná, vamos comer dalgo nun momentín y entamamos a les diez y media en puntu”.

Nun cargo les tintes contra Patrulla Dixie; supongo que tendríen motivos de pesu pa entamar una hora más tarde de lo previsto. Y tristemente ye un vezu ente los músicos, entamar a la hora que-yos da la gana. Munches veces (nun sé si yera esti el casu) porque “esperan a que venga más xente”. El resultáu ye que la xente que vien tarde ye más importante, y recibe más atención, que la xente que se apuró pa ser puntual. Toi un poco fartu.

Namás que sepan ellos y tolos músicos que llean esto que, con motivos de pesu o ensin ellos, hai xente que va a una ciudá o un sitiu específicamente pa velos, que se organiza pa llegar a la hora, y que si el conciertu entama una hora más tarde, pues acaben de tirar una hora y de apurase pa ná.

Pero bueno, en conclusión: que la música de Patrulla Dixie encantóme. Prestóme pola vida volver a oyir Royal Garden Blues, Saint James Infirmary, y tantes otres canciones que foron coles que me enamoré del jazz, oyendo a Louis Armstrong y a la mítica Canal Street Jazz Band. Ah, y aquel Sugar que tanto me prestara con Peggy Lee, y que escaeciera va tiempu. Gracies, Patrulla.

Anuncios

3 comentarios to “Patrulla Dixie en Avilés”

  1. Anonymous Says:

    Bones!Soi Fabián, de "Patrulla Dixie". Lo primero, date les gracies por tu crítica, los comentarios tantu positivos, como los que nun lo son tantu, ayúdennos a siguir alantre y ameyorar.Lo segundo ye que "Patrulla Dixie" nunca empieza los conciertos tarde (como muncho, los 5 minutos de rigor, jejeje). Y ye que me da la sensación que tabes mal informáu porque'l conciertu empezaba a les 22.30 y non a les 21.30 como tu comentes. Ello ye, que yera imposible que empezaramos a esa hora, porque estabamos tocando poles cais d'Avilés, como teníamos axustáu cola organización.En definitiva, que si hubo dalgún lio colos horarios nun foi culpa de "Patrulla Dixie"Esclariáu esto, espero que vuelvas venos en dalgún otru conciertu y te preste too, incluyío solos… Gracies!

  2. Guti Says:

    ¡Hola, Fabián! ¡Un honor que ún de los músicos pase per equí!Sí, nel vuestru casu ya me paeció que la hora yera un poco "por aproximación". El mi erru foi informame de les fiestes na web del Ayuntamientu d'Avilés. Foi ellí onde supe que tocábais, nel "programa reducíu".Y lo que pon ye, lliteralmente, esto:———-DIXIE BAND – 21.30 horas Estupenda banda de jazz clásico, heredera de las bandas de New Orleans. Recorrera las plazas y calles del casco Histórico y terminará actuando en la Plaza del Carbayedo, en el escenario allí instalado.———-Quedóme la dulda de si percorríen les cais a les 21:30, o si tocaben nel escenariu a les 21:30. Anduve golifiando pol cascu antiguu, pero nun sentí la música nin atopé los músicos… así que pensé que igual el paseu yera enantes. Tamién buscara perende más información sobre el conciertu, pero nun atopé nada que me valiera, así que esos párrafos yeren tolo que tenía.Bueno, total, que namás quería decir que lo de la hora ye importante (y nun me importaríen diez, o hasta venti minutos), porque hai músicos que "pasen". Ya veo que nun ye el vuestru casu.Sobre los solos… cásique me da vergüenza decir ná a xente que toca asina, pero bueno, siéntome obligáu como espectaor :-)Por supuesto que si tengo ocasión de vevos más veces, verévos. Nun te quepa dulda. Paezme un luxu tener equí al lláu una banda de dixie (nun lo sabía) y que suena tan bien. Prestóme pola vida.

  3. Guti Says:

    Por cierto, la organización bien, pero si atopas una páxina onde aparezca eso de les 22:30, ya me lo dices, por curiosidá 🙂

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s


A %d blogueros les gusta esto: