¿La mi última clas?

Ayeri di una clas, y de momentu ye la última.

Bueno, non. Fáltenme otres dos. Pero son de actividáes práutiques. Ayeri foi la última clas “expositiva”. Acabóse la materia. Y de momentu la mi intención ye que se haiga acabao definitivamente, o polo menos por un tiempu. Nun sé si voi cumplir el plan (ún non siempre fai lo que tien previsto), y de xuru que, anque lu cumpla, voi dar otres clases sueltes que me apeteza. Gratis. Pero de momentu, toi un poco cansáu.

Col mi tipu de contratu, a tiempu parcial, ca añu vas pa una asignatura diferente, ensin saber, munches veces, qué vas dar hasta el últimu momentu. Ye un retu, deprendí muncho, y pémeque siempre salí bien paráu. Toi arguyosu de toles clases que di. Nunca xubí a la tarima ensin tar preparáu y ensin cumplir colos mis alumnos (meyor o peor, claro, pero según la mi conciencia y lo que sé facer).

Fice delles coses que nun sabía que podía facer. Terminé la tesis doctoral. Di materies que nun conocía muncho. Ayudé a terminar el proyeutu fin de carrera a xente que llevaba diez años ensin ponese con ello. Y a dalgún otru que… digamos que foi un milagru que lo algamara. Tamién trabayé con una alumna sorda, que sacó la carrera. Tuve en cargos de direición (que tampoco pensé que fora ser capaz, siendo como soy un desastre pa les feches y los nomes). Di clases en inglés. Llueu la Universidá punxo normes pa ello, que yo nun cumplía; fice 60 hores de cursos, cumplílos, y acreditéme otra vez pa dar clases n’inglés (y fícelo delles veces; esti añu, sin dir más lloñe). Deprendí munches coses, fíceme meyor, y pémeque ayudé a della xente. Pémeque fice el mundu un pocoñín meyor.

Pero cansé un poco del retu. Ya me demostré que pueo facer eso, pero el casu ye que asina nun pues meyorar. Nun pues pensar cómo cambiar coses pal añu siguiente. Y pa enriba veste liáu con muncho más trabayu burocráticu del normal. Les clases acaben siendo lo que menos trabayu te da. Y yo nun toi na Universidá pa eso, precisamente. Y si a eso sumes que nun tienes la cabeza ehí al cien por cien (en realidá, teóricamente tienes menos del 50%)… nun ye manera. Nun se disfruta tanto.

En realidá tuve muncha suerte; siempres me tocaron asignatures afayaíces, trabayar con buenos amigos… pero aun así, cansé. Llevo quince años dando clas. Asina que ayeri, si nun cambia nada, cerróse una etapa.

Ayeri pregunté a la xente si sabía lo que yera la paridá (non), y entós pasé-yos unes reproducciones de tarxetes afuracáes y díxe-yos lo que yeren. Despliqué que nun yeren mui fiables, que pa eses coses se entamó a usar la paridá, y que un tal Hamming por culpa de les tarxetes fizo un códigu de paridá que permitía non sólo atopar erros, sinon arreglalos. Y a partir d’ehí… despliqué les configuraciones RAID. Y terminóse el temariu. Tol mundu coló, y la clas quedó asina. Y terminaron (de momentu) quince años. Falta muncho, otres dos clases, desámenes, recuperaciones, lo que se quiera. Pero ayeri terminó un ciclu.

relojUltimaClase

ultimaClase

Anuncios

4 comentarios to “¿La mi última clas?”

  1. Emilio Molina Says:

    Un ciclo que dura 15 años. Usas un reloj que va aproximadamente a 2’11*10^-9Hz.

    Mucha suerte en cualquiera que sea el próximo reto 🙂

  2. guticr Says:

    “un reloj que va aproximadamente a 2’11*10^-9Hz.”

    Moooola 🙂

  3. M Says:

    Yo tuve la suerte de formar parte de los alumnos a los que diste clase y sinceramente de los mejores profesores que me encontrado, un auténtico lujo.

    Como dice Emilio, mucha suerte sea lo que sea que vayas a hacer

  4. Beautiful Lokelele | Diariu de Guti Says:

    […] El vienres pasáu, por sorpresa, los mis compañeros de la Universidá ficiéronme una cena de despidida. […]

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s


A %d blogueros les gusta esto: