Archive for the ‘Regulación’ Category

El Colexu que nun quiero

1 01UTC diciembre 01UTC 2008

Siguiendo coles reflexiones sobre la regulación de la profesión informática, un par de notes cencielles. Daqué que se escaez munches vegáes. Muncha xente da por xuro cómo ye un colexu profesional, pero equí ta lo que yo pienso sobre cómo quiero que seya el míu, y pémeque se suponen demasiáes coses que nun hai por qué suponer:

Ensin colexación obligatoria. Toi pola regulación de la profesión, pero eso nun quier decir necesariamente que haiga que colexase pa exercer. Veo el Colexu comu una institución llegal y comu un valor añadíu; del colexu échente si cometes faltes graves, y queda apuntáo lo que ficiste. Además, el colexu da formación a bon preciu, actualizada… Y dellos otros servicios que son buenos pa un profesional. A mí, que el que me atiende tea colexáu abúltame que ye una seguridá añadida. Pero el que nun lo vea asina, ta nel so drechu. Nun me paez que tenga que ser obligatorio colexase pa que el colexu faiga la so xera.

Ensin cuotes abusives o obligatories. Si lo anterior ye verdá, nun fai falta decir muncho más, porque ensin colexación obligatoria, les cuotes difícilmente diben ser abusives. Habrán tener un preciu que a la xente-y paeza xustu.

Ensin trámites obligatorios. Por exemplu, el visáu o coses asina. Anguañu muncha xente refuga tener que pagar perres al colexu d’arquitectos, por exemplu, pa visar cualquier planu, y eses cuotes abúlten-yos abusives. Yo veo el visáu y coses semeyes comu una garantía más, un grau de seguridá no que se fai. Si ún quier custodia del códigu fonte, habrá pagalo, y sedrá porque-y paez que lo necesita. Pero nun hai por qué pensar que vaiga ser too obligatorio y caro. Ye un serviciu que agora nun da naide, y que asina daría daquién; na más.

Otra cosa, claro, ye que una alministración, o una empresa, considere que ye útil o importante un visáu pa tolos sos proyeutos, y lo ponga como norma. Pero eso nun me paez mal; nun me paez peor que pedir la ISO 9001, o cualquier otra triba de compromisu o sellu de calidá. Si ye el del colexu, pues como si ye otru que nun mos escandaliza.

Total, que delles idegues sobre cómo ye un colexu tan sacáes de cómo son otros pervieyos. Yo quiero igualdá de condiciones pa la mi profesión, y la misma dignidá que pa otres; pero eso nun quier que a la fuercia haiga que importar tolos vicios o erros de tolos demás. Además, hai que alcordase de que munches de eses imposiciones de otros colexos diben ser mui difíciles de asitiar güey, por muncho que dalgún lo quixera. (Nel tiempu que tuve trabayando col colexu d’Asturies, enxamás se faló de les coses anteriores; por exemplu falóse de ufiertar visáos, pero nunca nun sentí falar de trabayar pa que foren obligatorios. Nin se mos ocurrió.)

El mitu del intrusismu

24 24UTC noviembre 24UTC 2008

Na sociedá d’anguañu tienen muncha importancia los aviones. Enantes yera raro, pero güey, cásique tol mundu, quien más quien menos, tien que esnalar pa dalguna parte y andar d’avion n’avión dalguna vez.

¿Pué la xente coyer aviones, y usalos? Claro que sí. ¿Pue la xente trabayar llimpiando aviones? Sí. ¿Y metiendo comida dientro? Sí. ¿Y pintándolos? Sí. ¿Y revisándo-yos la mecánica? Sí. ¿Y dibuxándolos o diseñándolos? Sí. ¿Y conduciéndolos? Sí. ¿Y mercándolos? Sí. Y milenta otres coses.

Más o menos tol mundu pue trabayar colos aviones, y nos aviones, y beneficiase de esi inventu. Pa dalgunes de les xeres asociáes a él fai falta una cualificación profesional. Nun creo que cualquiera puea facer la revisión de seguridá; habrá ser un téunicu formáu pa ello. Supongo que hasta dependa del modelu d’avión, y faigan falta cursos específicos. Y tamién pa ser pilotu, o controlaor aéreu. Yo nun veo nada raro neso. Que a mí nun me dexen pilotar un avión, por exemplu. Non, nun digo que el mercáu me dexe fuera a base de estrellar aviones, o que nun me contraten porque el serviciu que doi nun ye buenu, o que la xente escueya viaxar conmigo o non según si quier suicidase o non. Yo nun pueo pilotar aviones, y puntu. Nengún avión. Dempués de sacar el títulu, dexaránme. Sicasí, pueo salir borrachu y armala anque tenga’l títulu de pilotu. Pero de mano habré demostrar lo mínimo, lo que se pue comprobar de mano ya oficialmente. Polo menos asegúrense de que se fizo lo que humanamente se podía pa que nun la armara.

El mismu razonamientu val pa la informática. Muncha xente ta contra la regulación porque creen que nun van dexalos averase a un ordenaor (y ye de lo que comen). Y nun ye asina. Naide quier eso. Hai munches, munches coses que se puen facer con un avión aparte de despegar y posase. Nun fai falta que el tapiceru seya pilotu, o que’l direutor del aeropuertu seya pilotu, nin que’l dueñu de la compañía seya pilotu. Lo que fai falta ye que pa determináes xeres se acredite un determináu perfil, oficialmente y de manera demostrable.

Por exemplu, y falando d’informática, cuandu nun xuráu deciden si una presona va pa la cárcel, y el testimoniu téunicu ye decisivu, el estáu tien que asegurase de que-y pregunta a daquién cualificáu. Ehí sí, tien que constar nel papel. Tien que tener forma xurídica. Y ehí pémeque el que fale tien que ser tituláu na materia. Bueno, dizlo la llei, nun ye cosa mía; eso ya tá regulao, anque dalgunos nun quieran dase cuenta.

Podemos pensar en facer desámenes pa too esto, pero ye que ya tán fechos. N’España la Universidá ocúpase de verificar conocimientos, y ya falé d’eso. Nun veo el problema.

Yo sólo falo d’intrusismu nesos pocos casos, concretos y xustificáos. Ah, pue haber quien piense que de informática sabemos toos. Y namás voi decir una cosa: la forma d’ignorancia más grande ye la que tien el que… nun sabe que ye ignorante. Lo primero que deprende ún cuandu entama a estudiar (cualquier cosa) ye precisamente tolo que-y queda por saber tovía. El que nun lo sabe, ye que sabe mui, mui poco. Y veo muncho d’eso cuandu se fala d’informática.