Archive for 29 julio 2010

Toros en Cataluña (III): salven los toros

29 29UTC julio 29UTC 2010

Yo enantes taba en contra de la oficialidá del asturiano, porque paecíame que hebía munches víes intermedies pa poder convivir toos agusto. Pero la realidá fízome camudar d’opinión. Los mesmos que dicen que nun fai falta coarten el so usu col argumentu de que nun ye oficial.

Y yo enantes taba en contra del separatismu de los catalanes y otros, porque paecíame que hebía milenta maneres de convivir tando toos razonablemente agusto. Pero claro, sólo se convive si se quier.

Cola escusa del estatutu catalán vimos a munchos políticos y ciudadanos decir milenta vegáes que lo bueno, lo grande, lo estupendo, son les autonomíes, y que nun fai falta dir más allá. Que los catalanes tienen cotes d’autogobiernu mayores que munchos estáos federales, y too eso.

Pero esos mesmos políticos y ciudadanos, a la primera oportunidá, namás que porque el parlamentu catalán decide prohibir un espectáculu con razones de bastante pesu, salten como alimañes, traten a los catalanes de too menos de guapos, dicen que esto ye “casposo”, “liberticida”, “totalitario”, “crisis nacional”, “drama”. Y van usar les instituciones centrales pa prohibir a los catalanes que prohiban les corríes de toros, y dá-y la vuelta a lo que decidió’l so parlamentu, y los toros han de gustayos por cojones, que ye como se faen les coses en la España tradicional: por cojones.

Nun pegues tiros, porque pues ser separatista ensin tiros. Pero si yes separatista, meréceste la trena. Nun pidas independencia, porque equí cabemos toos y hai democracia. Pero si nun te gusten los toros, nun yes español, y ya fadré lo que tenga que facer pa que pases pol aru.

Asina que, tristemente, voy tener que dá-y la razón a Carod Rovira.

Por cierto, que dalguien me desplique si esta portada nun sería motivo pa avergonzase de trabayar nun periódicu, que dexa de ser un periódicu pa convertise en una cloaca enllena mierda.

Bueno, nun ye nada nuevo nesi periódicu.

Yo sé que los favoratibles a les corríes nun son torturaores malvaos; son xente que ve les coses d’otra manera, que pa mí ye equivocáa. Sé que merecen ser escucháos como ciudadanos que son, y faigo por oyilos falar, a ver lo que tienen que decir, a ver en qué parte tendrán razón (en dalguna tendrán), por si a mí se m’escapa dalgo.

Pero dempués d’escuchar atentamente lo que teníen que decir, dempués d’escuchar los sos argumentos, de pensalo, aporto a una conclusión. O tolos representantes que escoyeron pa argumentar son fatos perdíos, o tolos argumentos que tienen son burricáes y mazcayáes. Namás con otra cosa vi una falta de razones tan grande: col tabacu.

Los toros tienen que ser una droga. Nun se desplica otra cosa.

Pero tengo la solución.

Si les corríes de toros son un arte tan imprescindible, si esi arte xustifica la barbarie y la brutalidá de francer un animal en público, si la prohibición ye motivu pa agredir ya insultar al parlamentu catalán y a toos los catalanes, si la cosa ye de verdá tan importante y merez la pena too eso…

Inventen les corríes ensin sangre.

Ye así de simple. Toreen ensin clavar coses. Piensen, investiguen, evolucionen, lleguen al sieglu XXI.

Non, non me digan que eso ye imposible y nun entiendo de toreo. Porque entós yo, con razón, diré que lo fundamental nes corríes ye la sangre, y que va ser que sí son ustedes unos sádicos miserables.

Hai dos caminos: ún d’ellos implica que se yos dea a ustedes la solución fecha diendo contra el xacíu común y les lleis de Cataluña y la voluntá de los catalanes y les instituciones españoles, y otru implica que seyan ustedes los que se busquen la solución pa salvar eso que llamen arte. El esfuerciu han facelu ustedes. Si nun quieren, so far so good.

Anuncios

Toros en Cataluña (II)

28 28UTC julio 28UTC 2010

Por cierto, al filu de lo anterior, y dempués de echar un güeyu a esto de Zabala de la Serna:

Llanto por la fiesta

pocas veces vi una riestra mayor de sandeces, desprecios al catalán, insultos, victimismos, partidismos y tonteríes. Argumentos: nengún. Pero qué se va esperar d’un críticu taurín.

Por cierto, ya tan pensando ganar nel Constitucional lo que nun puen ganar notra parte. Y pa eso van a los dos argumentos de la no-intelixencia: el argumentu de tradición, y el d’autoridá. Quieren usar cites de Lorca (que pa esto nun ye roxu nin maricón) y de Valle-Inclán.

Pues yo prefiero citar a Unamuno. En Niebla, punxo en boca de Víctor Goti les sos propies pallabres; asina que Goti dixo d’Unamuno:

Porque le saca de sus casillas el que digan que nuestro pueblo, sobre todo el meridional, es ingenioso. “Pueblo que se recrea en las corridas de toros y halla variedad y amenidad en ese espectáculo sencillísimo, está juzgado en cuanto a mentalidad”, dice. Y agrega que no puede haber mentalidad más simple y más córnea que la de un aficionado. ¡Vaya usted con paradojas más o menos humorísticas al que acaba de entusiasmarse con una estocada de Vicente Pastor! Y abomina del género festivo de los revisteros de toros, sacerdotes del juego de vocablos y de toda la bazofia del ingenio de puchero.

[…] “A un borracho se le puede hablar –me decía una vez– y hasta dice cosas, pero ¿quién resiste la conversación de un jugador o un mujeriego? No hay por debajo de ella sino la de un aficionado a toros, colmo y copete de la estupidez.”

Fuerte, pero les reclamaciones… a Unamuno.

Los toros en Cataluña

28 28UTC julio 28UTC 2010

Tamos de norabona. Güey ye un día grande. Prohíbense les corríes de toros en Cataluña.

Ente los diputáos que votaron pola prohibición, ¿hailos que voten por nacionalismu o antiespañolismu? Pué ser. Pero el casu ye que naide ta llexitimáu pa xulgar les intenciones ocultes. Lo mismo se pue decir que los que votaron contra la prohibición fáenlo por intereses económicos personales, o porque yos gusten personalmente les corrides, o por nacionalistas españoles, o porque son sádicos y torturaores. Too eso ye un brindis al sol.

Como diz xente del PP, ¿ye un “disparate” evitar que se faiga un espectáculu públicu martirizando un animal? Pémeque el disparate ye lo contrario.

¿Ye negar la llibertá de catalanes y españoles? Non; impedir a un facinerosu facer tropelíes nun ye negar llibertáes.

¿Son “los toros una fiesta tan catalana como de cualquier otro lugar de España”, como diz Cospedal? Sí, eso ye verdá: nun son una fiesta, y nun tan “empadronáos” en provincia dala. Son una afición d’una serie de persones particulares. Así que son tan fiesta catalana como cocina extremeña: nenguna de les dos coses.

¿”Es un verdadero drama para España que el PSOE esté permitiendo que en Cataluña, donde gobiernan, se salga en manifestación o se apruebe una petición que niegue la libertad de los catalanes para asistir a las corridas de toros”?

Esto ya merez un análisi más detalláu.

¿Pue el PSOE “nun permitir” que en Cataluña se presente una iniciativa llexislativa popular? ¿Pue “nun permitir” que se salga en manifestación? ¿Pue “nun permitir” que se vote una ILS nel parlamentu?

El drama pa España, ¿nun sedría precisamente lo contrario, que el PSOE “nun permitiera” dalguna d’eses coses? ¿Nun sedría eso “negar la llibertá”? ¿Nun sedría eso un golpe d’estáu y una traición al pueblu al que representa el parlamentu? ¿Y si el PSOE “nun permitiera” manifestaciones o iniciatives contra el abortu?

Bueno, dalgunos, nuna situación semeya, sentiríense en “extraordinaria placidez”. Y falando de Mayor Oreja, ¿qué dixo él?

Que esto ye “la expresión de la ofensiva nacionalista”, y de la “profunda crisis nacional que vive España”. Tamién dixo que “uno puede decir que es una provocación, una venganza por el éxito de la selección nacional (de fútbol), una manera de vengarse del Tribunal Constitucional”.

¿El éxitu de la seleición de fúbol? Pero ¿lo de Suráfrica foi méritu de los toreros? Y los 180.000 catalanes que presentaron la ILS en febreru pasáu, ¿golieron que’l equipu español diba pasar de cuartos en branu?

¿El tribunal constitucional? Pero ¿tá formáu por banderilleros, o por monosabios?

Pero ¿nun yeren los separatistas catalanes los que mestaben, erróneamente, política y toros?

¿Ye Mayor Oreja separatista catalán?

Dicen que lo aprobáo permite otres “fiestes” (ja) tradicionales con toros. Si ye asina, ye de vergüenza. Pero ye difícil algamar que los políticos faigan too bien de golpe, como ficieron col tabacu. Polo menos, ye un pasu na direición correuta.

A ver si agora otros tomen exemplu de Canarias y Cataluña.

Prius (II)

26 26UTC julio 26UTC 2010

Al filu de lo que apunté va tiempu,

23-7-2010: 62,6 km – media de 3,7 l/100 km a 67 km/h
25-7-2010: 146,1 km – media de 3,8 l/100 km a 65 km/h

Si les circunstancies del tráficu lo permiten…

Libranda

20 20UTC julio 20UTC 2010

Muncha xente diz que los llibros dixitales nun van sustituir a los llibros en papel. Que lo del MP3, val, pero que los llibros son diferentes, que son insustituibles. Que el oxetu físicu ye perimportante.

Y yo nun lo tengo tan claro. Tristemente, va tiempu (dende que merqué un llibru dixital y lu probé) que toi convencíu de que los llibros dixitales van sustituir, en una gran medía, a los de papel. (Digo tristemente porque me paez que los llibros de papel tienen cualidáes importantes, pero bueno, esi ye otru tema.)

El casu ye que lo de la música dixital y la desaparición del discu igual foi una sorpresa pa munchos. Lo del cine, tamién (tamién hebo quien pensó que les sales nun se podíen sustituir, que les películes nun podíen almacenase en discos duros; y agora hai quien diz que el 3D ye lo que nunca nun va poder salir del cine… Ilusos).

Pero lo que nun pue ser una sorpresa ye lo de los llibros. Ya hai demasiáos precedentes. Tamos toos avisaos. ¿A la tercera va la vencida?

Entós, les editoriales españoles, por fin, decídense y monten Libranda, una plataforma pa vender llibros dixitales. Voi facer una prueba, una facilina. Voi mercar La sombra del viento, de Carlos Ruiz Zafón.

Voi y búscolu. Aparez. Pincho nel iconu de la tienda, pa compralu. Y atópome… una llista de tiendes. Venga, na primera, Leqtor. Y entós… llévame a la páxina principal de la tienda.

Eso quier decir que pa mercar un llibru he buscalu DOS veces, en páxines distintes. En fin. Búscolu. Y aparez. Y cuesta 8,99 €. Pa compralu hai que rexistrase (nun ta mal, si ye pa lo que dicen, pa que pueas descargate los tos llibros siempre que quieras), pero dando los datos d’ún (eso gústame menos; NUNCA tuve que facer eso nuna llibrería de verdá).

Esi llibru pue comprase na FNAC y en El Corte Inglés, en papel, por 10,95 €. O sea, que quitando papel, imprenta, tresporte, dependientes, y too lo demás, rebáxente menos de 2€. Menos d’un 18%. N’Amazon pues atopalu, en papel, por menos de 7 €, traducíu al inglés.

Esti ye un momentu críticu pa la industria editorial. Si anden llistos, se mueven rápido, y monten una plataforma na que sea perfácil y perbarato comprar, que casi se faiga solo, que ún tenga la sensación de que-y tan ufiertando dalgo que merez la pena, igual podíen conseguir que la xente se avezara a comprar llibros dixitales dende’l entamu, y que esi vezu quedara. Igual podíen escapar de lo que-y pasó -y-va pasar- a la música.

Pero prefieren dase el mismu sapiazu.

Pémeque ficieron esto de mala gana, porque nun-yos quedó otru remediu, y pa poder decir dempués que ficieron lo que pudieron, pero que la xente ye ladrona por naturaleza. Nun creo que fora una apuesta de verdá pol futuru de les tiendes de llibros. Y si lo ye, ta permal fecho.

Y eso que busqué un llibru perconocíu (la xente diz que ufierten mui pocos), y eso que namás foi a comprar, non me punxe a lleer (dicen que los llibros lleven DRM y que pa lleelos too son trabes, que nun funciona).

El restu será hestoria.

En resumen

19 19UTC julio 19UTC 2010

En resumen, que pasaron les JENUI.

Que pasó tamién el VII Seminariu d’Improvisación de Siero, y conocí a Jokin o a Esther, y torné a ver a Marisa, Mónica o Rodrigo.

Que encerráu nun sitiu y nel otru pasó un cachu de les mis vacaciones, más liáu y ocupáu y desconeutáu que si tuviera trabayando.

Que toqué el vienres pasáu cola big band d’alumnos, dirixía por Jose Gallardo, Harlem Nocturne, Georgia On My Mind y Basin Street Blues. Que deprendí a tocar con una orquesta d’eses (onde la guitarra malapenes se siente), a usar voicings de tres notes, y hube de lleer una partitura pa trompeta… y conseguílo, yo que malapenes sé lleer música.

Que tamién el vienres toqué na jam session nel Danny’s Jazz, temas que nun conocía (Equinoxe), otros en tonos que nun sabía, otros cola partitura en Eb… un xaréu, pero nun salí malparáu. Que lluéu tocaron los profesores y… Jose Gallardo, José Ramón Feito, Marco Martínez, Horacio García, Mapi Quintana y ayudólos Moragas na batería. Nun voi decir ná, namás que foi ún de los meyores conciertos que vi en mi vida.

Que al final España ganó el mundial. Y que Telecinco tuvo el so besu (ni que fora cosa de guionistas). ¿Qué fice? Evitar toes les imáxenes y noticies de celebraciones y peyeyáes, y quedame namás cola alegría de Del Bosque, Iniesta, Casillas, y tola demás xente que me abulta que son xente racional y decente. Sobre too, Del Bosque. A la salú del zopencu d’Hortaleza.

Como tuve liáu, y me quedé colo positivo, nun fue tan mal la cosa.

En Santiago

7 07UTC julio 07UTC 2010

Otra edición de les JENUI. En Santiago.

Calor. Añu xacobeu o nunsequé. Y enrriba xuega España, y pémeque ta acabante de ganar les semifinales del mundial (polos berríos que siento na cai).

Pero xente maja, idegues interesantes: “las pelotillas de Luciano”, y aquello del reconocimiento de vídeu pa ver si la xente fala bien nes presentaciones de PFC (¡sí!, en tiempu real, y paez que funciona). Y munches otres.

Con ganes de volver pa casa, pero ensin quexame. Préstame anque seya trabayu.

Güey tuve viendo los edificios hestóricos de la Universidá de Santiago, y el paraninfu ye perguapu.

Tengo que preparar les mis presentaciones… Mañana tengo les dos.

España se rompe

6 06UTC julio 06UTC 2010

España se rompe.

Por culpa de los malditos separatistas centrífugos.

El parlamento español aprueba una ley sanitaria (sobre el tabaquismo), y varias comunidades la incumplen, o emiten leyes que la contradicen directamente.

El gobierno español aprueba normas fiscales, y varios cantones irredentos anuncian una insumisión, y sus líderes políticos animan a los ciudadanos a ello.

Las instituciones españolas aprueban contenidos comunes para toda la enseñanza pública, y en varias comunidades se promueve la “objeción de conciencia” o se boicotea una asignatura o se imparte en inglés.

El parlamento español aprueba una ley para ayudar a las personas más desfavorecidas (los grandes dependientes) y algunas comunidades retrasan su aplicación práctica para dejarla sin efecto.

El parlamento español aprueba una ley sobre salud sexual e interrupción del embarazo, y varias comunidades anuncian que no aplicarán esa ley, que “no hay motivo para hacerlo”.

Malditos separatistas centrífugos, minoritarios, extremistas…